2025ko maiatzaren 16an, ostirala
Donostian, 2025eko maiatzaren 16an
Euskal Herriko Arkitektoen Elkargo Ofizialaren (EHAEO) Gipuzkoako ordezkaritzaren Kultura batzordeak hausnarketa- eta eztabaida-jardunaldi berri bat antolatu du aurrekoaren izenburu berarekin: Hiri Eredua: Donostia-Gipuzkoa 2035. Apirileko jardunaldian Donostiako Udalean ordezkaritza duten alderdi politiko guztietako ordezkariek parte hartu bazuten, oraingoan gaian adituak diren hiru arkitekto hirigilek emango dituzte hitzaldiak: Ángel Martín, Sebastià Jornet eta Patxo de León. Onodren, Izaskun Aseguinolaza arkitekturan doktorean moderatutako eztabaida egongo da. Topaketa maiatzaren 22an, osteguna, izango da, 18:00etan, UPV/EHUko Arkitektura Eskolako Paraninfoan. Sarrera doakoa da, baina aldez aurretik izena eman behar da COAVN Gipuzkoaren webgunean.
Gipuzkoako etorkizuneko lurralde eta hiri ereduari buruzko hausnarketa eta eztabaida zikloarekin jarraitzen du Gipuzkoako EHAEOk. Hurrengo jardunaldiak, Hiri eredua: Donostia-Gipuzkoa 2035 (II) izenekoak, Gipuzkoako hiriburuaren egungo egoera aztertzea du helburu. Hiriaren eta lurraldearen ikuspegitik abiatuta, hiriaren indargune nagusiak eta aurrean dituen erronkak identifikatuko dira. Halaber, etorkizuneko eraldaketa bidera dezaketen plangintza-tresnak eta politika publikoak jorratuko dira, eta arreta berezia jarriko zaio HAPOaren bilakaerari, hiri bidezkoago, jasangarriago eta erresilienteago baterantz aurrera egiteko erreminta den aldetik.
Topaketa maiatzaren 22an izango da, Donostiako Arkitektura Eskolako Paraninfoan, 18:00etatik aurrera, eta arlo horretan ibilbide luzea duten hiru hirigile adituk hartuko dute parte. Hain zuzen ere, Ángel Martín, arkitektoa eta Kataluniako Unibertsitate Politeknikoko Hirigintza eta Lurralde Antolamenduko katedraduna; Sebastià Jornet, arkitekto hirigilea eta JORNET LLOP PASTOR estudioko bazkide sortzailea; eta Patxo de León, arkitekto hirigilea, bere ibilbide guztia hirigintza planeamenduari, lurralde kudeaketari eta hiri diseinuari eskaini diona. Ondoren, Izaskun Aseguinolaza arkitekto doktore eta UPV/EHUko Arkitektura saileko Hirigintza eta Lurralde Antolamendu Arloko irakasleak gaiari buruzko eztabaida moderatuko du. Sarrera doakoa izango da, baina aldez aurretik izena eman behar da Gipuzkoako EHAEOaren webgunean.
Jardunaldi hauei buruz
Gipuzkoako EHAEOk 2022ko amaieratik Gipuzkoako Foru Aldundiko Mugikortasun, Turismo eta Lurralde Antolamendu Sailaren laguntzarekin bultzatutako Etorkizuneko lurralde eta hiri ereduari buruzko gogoeta eta eztabaida jardunaldien barruko hamabigarren topaketa da hau.
2025erako, guztira, bost jardunaldi programatu dira. Lehena martxoan izan zen, Zarautzen, klima aldaketak kostaldeko eremu urbanizatuei nola eragiten dien ardatz hartuta. Bigarrena apirilean egin zuten, ordezkari politikoen artean Donostiaren etorkizunari buruzko eztabaida eginez. Hirugarren jardunaldi honek gai horri buruzko hirigintzan aditu direnen ikuspuntua eskainiko du.
Uda ostean, zikloak beste bi saioekin jarraituko du: irailean, Easoko Trenbide Hondartzaren etorkizunaz eztabaidatuko dute Donostian, eta azaroan, Hondarribian, turismoaren eta hiriaren arteko harremanaz arituko dira. Jardunaldi guztietako bideoak Gipuzkoako EHAEOaren YouTube kanalean ikus daitezke.
